「西」遊記：去西藏旅行DOs & DONTs－LiuPay畫画Blog

西藏，

我最近去左，

幾好feel。

去之前自己有d諗法：

西藏好靚、有沙漠、有牛羊，有珠峰、有布達拉宮、有喇嘛，所以想去；

但西藏旅行最少要十幾日、高山症、暴動、公安、好難搵伴一齊去，

所以亦都唔係咁想去。

西藏桑耶沙丘～

幾經心理爭扎，又適逢幾個fd夾到假期，

又咁岩撞正轉工空檔時間，所以最後都係決定去。

去西藏旅行，最擔心o既應該係

（1）行程；

（2）天氣；

（3）高山症

＝＝＝＝＝＝＝＝＝＝＝＝＝＝＝＝＝＝＝＝＝＝＝＝

（1）西藏行程：

去西藏旅行，

搭火車要56個鐘，

搭飛機要轉幾轉，係機場過夜，共十幾個鐘

無論揀邊個方法都係辛苦，

其實去西藏就係辛苦

如果抱住去日本、韓國、台灣o既心態去西藏就完全錯晒

＝＝＝＝＝＝＝＝＝＝＝＝＝

西藏係一個省（自治區，即省），

佢o既大細根本隨時大過歐洲是但一個國家

西藏海拔由3千幾－5千幾（唔計6、7、8千個d山峰），

交通極不方便，地鐵係無o既，鐵路只有出入西藏o既路線，

省內係各地區、城市係完全無鐵路連接

西藏只有「公路」同埋「石路」

咁o既情況只有以下方法玩：

低級：跟團去（超貴，團費萬萬聲咁計）

中級：「半」自由行，講緊o既係自己去到西藏先，之後再去搵司機租車，

自己plan行程，叫佢車你去lee度去個度（我就係lee個方法～=]）

高級：完全唔plan，去到先算，周圍截順風車，睇下會去到邊度

（唔好以為我講笑，真係有唔少人咁玩…）

當然，如果用租車方法去玩，最好就係香港搵定司機，

講定價錢，但要預左佢地o既指定動作

－－＞去到之後抬價

不過抬價還好，好多人去到之後比個司機放飛機，

打亂晒行程…

好彩我搵個個只係「還好」那個~

＝＝＝＝＝＝＝＝＝＝＝＝

西藏旅行其實景點來來去去都係個幾個，

求其搵本旅遊書就會有晒，

但唔好諗住去晒，除非你有一個月以上既假期，

以下係本人玩左十二日精華遊o既路線~

（未去過o既應該只係識布達拉宮、珠峰兩個）

＝＝＝＝＝＝＝＝＝＝＝＝＝＝＝＝＝＝＝＝＝＝＝＝

（2）西藏天氣：

我在9月去西藏

9月應該係去西藏最佳季節，

冬天，你應該都唔會想去西藏掛，

而西藏7、8月係雨季，

3月同6月係西藏政治上敏感o既日子

西藏海拔高，去之前會以為天氣好凍，

的確天氣係有d凍，但到晏畫會上到廿幾度，幾熱，

夜晚就會下降到個位數字，

以上講緊o既係拉薩，拉薩係西藏首府（海拔3600m）

而離開拉薩之後，除左「林芝」、「山南」之外，

大部分地方都高過拉薩，

天氣會凍好多

不過就算怕熱都好，著多件衫小心凍親，

係西藏感冒唔係講笑，會死人GA！！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝

（3）高山症：

高山症，正確d講應該係高山反應，（多數人會簡稱「高反」）

高山反應對於生活係海拔0m o既香港人係一個未知o既恐懼，

亦都打斷好多人去西藏o既諗法

首先聲明：
我唔係醫生，以下只屬個人經驗，所以想清楚高山反應o既詳情，
問返你o醫生～

＝＝＝＝＝＝＝＝＝＝＝＝

不過，其實我唔係好感受到「高反」，
「高反」o既徵狀有：

頭痛、周身無力、作嘔作悶、失眠、吸氣吸極都唔夠等等，

高山症本身唔會死人，但如果有其他病症，
就係引發併發症，咁就會死嘞！
所以上到高原小心身體～（注意：我唔係醫生，上述只屬參考！）

作為一個間中有運動，二十多歲o既香港年青人，

高山症唔係好影響到我，只係去到珠峰大本營（海拔5200m）時，

先至出現頭痛…

但「高反」頭痛真係好痛，

痛到個人完全企唔直，講笑都無力，

只可以係度發呆…

＝＝＝＝＝＝＝＝＝＝＝＝

傳聞話去食紅景天可以預防「高反」，

其實都唔知有無科學根據，但為左心安都係照做啦… = =”

紅景天係去西藏前兩星期要開始食，一日一粒，

到西藏之後一日兩粒咁食= =”（都係個句：我唔係醫生，上述只屬參考！）

除左紅景天，係西藏真係中左高山症，就食一隻叫做「高原康」o既藥，
好似話可以舒解= = （我係珠峰大本營頭痛都有食佢= =）
（注意注意：我唔係醫生，上述只屬參考！）

其實去到西藏行下d藥房仲會見到氧氣罐同注射用o既「高反」藥，

我就無試過用嘞= =
不過係珠峰大本營見過真係有人「高反」到要打針！！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝

拉薩：

講完西藏旅行o既基本知識，
而家講下拉薩～

（之後再寫另一篇blog講珠峰）

拉薩，我用左3日係lee度玩，

第一日，落飛機，去酒店，行八廓街（市中心），八廓街夜市（地攤）

第二日，哲蚌寺（半山上o既寺），色拉寺（辯經），行沖賽康市集（市中心）

第三日，布達拉宮（不解釋），大昭寺（市中心），小昭寺（唔係好值得去）

其實我不打算解釋太多，

景點詳情係旅遊書睇晒，

只有以下幾點分享大家～

＝＝＝＝＝＝＝＝＝＝＝＝

布達拉宮！

去西藏，布達拉宮必去ga啦，

要注意！！！

如果係非冬天o既時間去，

要早一日朝早七點去到布達拉宮正面（南面偏西）停車場排隊拎籌，

一張回鄉證拎一張～

圖中下方隱約見到有堆人排隊，lee個位就係拎籌個位～

所以睇返上面我個行程，點解我會第三日先去布達拉宮，

第一日朝早11點先落機，去到拉薩市中心都已經12點半，唔夠時間拎籌，

第二日朝早去拎籌，

第三日先去到

拎籌現場有好多地膽話收你錢幫你拎籌，唔使排隊，

我一d都唔懷疑佢地會呃你，

但拎籌本身唔使錢，而佢地收你幾百數人仔拎一張籌實在太唔抵，

所以都係由七點排到九點拎籌….

（傳聞話一日只會派500張籌，所以有d人會心急搵地膽買籌，

不過係當地旅行社都好似話可以「買」到籌）

＝＝＝＝＝＝＝＝＝＝＝＝

哲蚌寺～

哲蚌寺，色拉寺距離拉薩市中心比較遠，

市中心有巴士可以去，

但去得西藏你實會去埋其他山山水水o既地方，

例如珠峰、羊湖、卡惹拉冰川等，

如果會租車，就索性叫埋個司機車多你地一日，去埋lee兩個寺～

哲蚌寺喇嘛～

色拉寺最特別就係有「辯經」活動，

d喇嘛會係度郁身郁勢係度討論經文，

要注意星期六、日佢地唔辯ga（我去個時正好星期六…）

色拉寺正門～

＝＝＝＝＝＝＝＝＝＝＝＝

十本旅遊書，十本都會介紹小昭寺，

如果跟左本書去o既話會後悔，

間寺唔同其他寺，lee間十分細，

十五分鐘行完，廿蚊人仔，真係唔係好抵

而且入面d野，其他寺都睇到…

＝＝＝＝＝＝＝＝＝＝＝＝

八廓街～其時晚上8點幾，西藏比較夜先天黑～

八廓街係拉薩市中心o既中心，最旺，
成條街都有手信賣，有野食，
如果買手信，係八廓街西面o既攤檔區買會比較平，
講價最多可以講到30-80%價錢（考你功力）

參考價錢如下：（人仔）

普通最平o既經輪	原價5	3.5買到
銅經輪	原價35	20買到
木製經輪匙扣	原價25-40	9.5買到
經幡	原價15-20	10買到
磁石	原價25-40	10買到
牛骨製手鍊（似念珠）	原價50	8買到
九眼天珠	原價30-100都有	35買到
（我笨了，由50講到35以為好抵，之後見到有地方賣30）

最平價的經輪～

Lee個攤檔區夜晚會閂晒門，

夜晚會有d人係度擺地攤，賣d再有特色d o既手信，
不過lee d 人完全唔講得價，
會黑面，唔睬你，唔賣野比你

＝＝＝＝＝＝＝＝＝＝＝＝

係拉薩，有間咖啡店係香港人買o既，（風轉咖啡屋）
第一日來到拉薩，剛下機又未適應高原氣候，
可以去lee度hea下，抖下～

＝＝＝＝＝＝＝＝＝＝＝＝＝＝＝＝＝＝＝＝＝＝＝＝

去西藏旅行小貼士！！！！：

小心凍親，高山反應遇上感冒會肺水腫，會致命
去之前搵定d有口碑o既司機 (有興趣可以問我= =)
要有被抬價o既心理準備…
tun下個mind set，去西藏無啖好食，又無覺好訓，
搭車又耐，d路又崎嶇，絕對係攞苦來辛= =”
雖然唔知係咪真係有用，為左心安，去之前食定紅景天= =
（防「高反」）
聽人講係西藏跑跳都會中「高反」（我無事= =”）
非冬天時間，去布達拉宮要早一日朝早7點去排隊拎籌，
第二日都憑籌買飛入布達拉宮
布達拉宮高100m，行上去都幾金，加油！
星期六日以外時間，先好去色拉寺睇辯經
手信係八廓街西面攤檔區買，
要講價，因為會平好多
夜晚係地攤買野唔好講價，個d係年青人，
你一講價就完全唔睬你，唔賣野比你
去拉薩以外o既地方要租車，坐大半日，
d公路係無路燈o既，西藏又無光污染，
夜晚係全黑，總之一切小心
西藏有好多機會接觸動物～
想抱抱藏敖（西藏敖犬），要去羊湖；想騎牦牛要去羊湖、納木措；
想騎馬要去雍布拉康...
(係拉薩搭車去其他地方，途中經常都可以見到牛群羊群～)
拉藏天氣乾燥，要keep住茶潤唇膏
西藏無乜野食好食，盡搵返d揚州炒飯、雞蛋面、牛扒等野食，
穩陣d